我唔太鐘意All Is Lost，但唔能夠唔唔承認佢特別，作為一套求生片，佢無搬主角既屋企人出黎，亦都無帶待佢既價值觀出黎，All Is Lost 唔再借掙扎過程去救贖或者回顧主角自己既人生。換言之，佢無照顧觀眾既內心旁白，亦都無交代主角回憶既蒙太奇，取而代之既只係八日不停但又帶點散漫既掙扎，而呢八日既求生過程，係用咗大量長鏡頭同特寫去特化求生過程既實感。
套戲由一開始主角已經自白話佢發現唔夠大自然鬥，無特別交代主角既位置，總之佢架船就係因為俾個貨櫃撞穿咗而開始咗呢個長達八日既求生之旅。係，呢八日係相當唔刺激，講緊既係，主角可以喺架船入面開爐煮飯，不慌不忙咁去睇下書，佢係完全唔知死，直到中後段佢發覺佢準備既野唔用得，先至真真正正知道自己有幾咁大穫。成套對白唔夠廿句，而演員亦都係得佢一個，呢套戲係真真正正既「人在野」，所有驚險情節，其中包括海難片常見，驚濤駭浪既場面，一概都被刻意淡化，有既只係接二連三既無奈。主角既情緒亦由原先既老定，變到對自己既生命絕望。睇All Is Lost, 好難唔令人諗起Murphy's Law，特別在於主角原先係非比尋常地有勁多資源(再一次，我覺得主角汒汒大海之中，生死未卜既時候，夠膽煮個西炒飯係超級有吉士)，但最後都變到連乾淨水都無得飲，所有野都因為小小原因而出錯。All is Lost 難得，難得在佢無煽情，無去話俾你聽，呢條友點解咁唔想死，咁唔應該死。只係人與生俱來，即使有老婆又好，無仔女都好，其實都唔會想死。但All is Lost 更重要既係，睇到個體面對大自然既時候既一種無奈同一步一步咁去接受。
沒有留言:
張貼留言