Sell me this pen - The Wolf Of Wall Street 《華爾街狼人》 (2013)

一講到華爾街，仲要係個人傳記，就一定會故仔離唔開估到主角點樣運用小聰明，慢慢咁上位，又一步一步咁因為無之不盡既貪念而引火自焚。《華爾街狼人》(我真係好唔鐘意呢個譯名) 有一大堆呢種類型電影特有既設定，例如話Jordan (Leonardo DiCaprio飾) 係一個反英雄，佢第一日做經紀果陣曾經諗過一邊賺錢，一邊幫其他客仔投資搵錢，但唔夠十五分鐘，佢第一個上司Mark Hanna(Matthew McConaughey飾)喺第一餐飯到已經開宗明義同佢講，要搵大錢，就要用客人既錢去搵更多既錢，而唯一支撐到佢喺華爾街呢種扭曲既價值觀下生存，就係性，同毒品。

比起同年大亨小傳 (2013) 既偽上流生活，華爾街既生活，無疑係「真實」好多，比起晚晚喺自己屋企放煙花去證明自己既價值，似乎都係一大堆裸女毒品派對先至係正宗有錢佬生活。接二連三既裸露，辦公室班人除咗打電話之外，就係不停既「開P」，第一個鐘，係好離譜，離譜到你覺得呢班人已經完全迷失咗喺呢個紙醉金迷既世界。原來所謂既「美國夢」，到最後都係離唔開性同毒品。而《華》前半部比起後半部非常隨心，睇得出係無咁多包袱，而對白亦都非常精準，好神奇地，睇《華》你唔會覺得緊張，取而代之既係一句又一句既抵死對白，Jordan 亦都得閒無事就望下鏡頭同觀眾一對一咁解釋自己做緊乜。


里安納度既表演好睇，雖然仍然有幾幕少少過咗火位，但係仍然不失為佢從影以來既其中一套代表作 (雖然要佢扮番廿零歲真係無乜說服力)。《華》既前半部係處理得非常好，節奏明快之餘又非常新鮮抵死，但劇情突然一慢，就無再去番前段既水平，中段似乎有少少散漫又帶點重覆，肥仔Donnie (Jonah Hill 飾)接二連三既犯錯，不斷用長鏡頭去解釋個辦公室點樣離譜，感覺上有少少攰同盲目。好彩個結尾有呼應番華爾街主要搵錢既方法，我鐘意馬田史高西斯用Sell me this pen 去完結呢個傳記，或者應該話傳奇。

《華》節奏唔算好快，特別係《華》無刻意交代佢點樣去避開FBI 既追查，全部野都係好慢條斯理，無鬥智鬥力既場面，反而避開咗俗套，於一般華爾街電影鮮有深入交代既「發達」同之後既放縱著筆。 Jordan 係抵死既，由佢踏入華爾街既第一日開始，佢既貪念已經注定佢會自我毀滅。但同時間，佢要人人一齊學佢發「美國夢」令到呢個人衰唔哂。客觀上黎講，Jordan 係一個「仆X」，佢拋棄糟糠之妻，但佢又未去到令人討厭既級數，《華》喺前半段係刻意淡化Jordan 個人既問題，因為全個華爾街上上下下都係咁樣運作，但後半段即使佢點樣折墮，Jordan 既形象其實仍然係相當可愛，甚至乎到最後佢其實仍然相信華爾街有兄弟情呢樣野。

馬田史高西斯好明白拍戲唔係用黎取悅其他評審去攞獎，佢夠膽將一個咁腐敗既華爾街放到銀幕上，呢個唔單止突顯咗佢既氣度，亦都證明佢係荷里活入面數一數二既大師。睇《華》，見到既仲有《Goodfellas》(1990) 同《Casino》(1995) 既影子，我甚至唔知可唔可以用影子去形容《華》，因為唔少手法，佈局，場景都係同以上兩套相當相似。唯一唔同既係，《華》放棄話俾大家聽做不法野其實係有幾咁「死路一條」，相反，套戲展示咗一個超乎常人想像既超現實世界，去話俾大家聽，華爾街既生活有幾咁荒誕離奇。

I fought 'til the end, I'm not sure what this worth, but know that I did. - All Is Lost 《怒海求生》(2013)

我唔太鐘意All Is Lost，但唔能夠唔唔承認佢特別，作為一套求生片，佢無搬主角既屋企人出黎，亦都無帶待佢既價值觀出黎，All Is Lost 唔再借掙扎過程去救贖或者回顧主角自己既人生。換言之，佢無照顧觀眾既內心旁白，亦都無交代主角回憶既蒙太奇，取而代之既只係八日不停但又帶點散漫既掙扎，而呢八日既求生過程，係用咗大量長鏡頭同特寫去特化求生過程既實感。

套戲由一開始主角已經自白話佢發現唔夠大自然鬥，無特別交代主角既位置，總之佢架船就係因為俾個貨櫃撞穿咗而開始咗呢個長達八日既求生之旅。係，呢八日係相當唔刺激，講緊既係，主角可以喺架船入面開爐煮飯，不慌不忙咁去睇下書，佢係完全唔知死，直到中後段佢發覺佢準備既野唔用得，先至真真正正知道自己有幾咁大穫。成套對白唔夠廿句，而演員亦都係得佢一個，呢套戲係真真正正既「人在野」，所有驚險情節，其中包括海難片常見，驚濤駭浪既場面，一概都被刻意淡化，有既只係接二連三既無奈。主角既情緒亦由原先既老定，變到對自己既生命絕望。睇All Is Lost, 好難唔令人諗起Murphy's Law，特別在於主角原先係非比尋常地有勁多資源(再一次，我覺得主角汒汒大海之中，生死未卜既時候，夠膽煮個西炒飯係超級有吉士)，但最後都變到連乾淨水都無得飲，所有野都因為小小原因而出錯。

All is Lost 難得，難得在佢無煽情，無去話俾你聽，呢條友點解咁唔想死，咁唔應該死。只係人與生俱來，即使有老婆又好，無仔女都好，其實都唔會想死。但All is Lost 更重要既係，睇到個體面對大自然既時候既一種無奈同一步一步咁去接受。

淨係用有無深度黎評電影果d人真係好自大

淨係用有無深度黎評電影果d人真係好自大

入面提出既觀點可能唔淨止可以應用喺電影方面，而係可以用落其他潮流文化，包括流行小說同流行曲。而最能夠反映呢個通病既，就係高登入面大大小小成日出現既「一人一套人生必看/必聽既歌」。呢個係好常見既現象，主流會將電影既深度同佢既內容掛鉤，而呢個所謂既「深度」其實只係好狹義咁去睇套戲帶出黎既訊息而忽略其他拍攝或者剪接技巧，例如高登常見推薦電影之一 - 命運自選台(2006) 帶出既「時間唔等人」，無錯係有個好正面既訊息，但同時間亦都證明咗部份人將一套電影既深度睇成有幾多「訊息」帶到出黎。

呢個現像或多或少都同經過精密計算既對白有關，即係大家依家入場睇戲，為既唔係單純既消費電影，而係為咗對佢產生一大堆反思，但偏偏呢D所謂既「反思」，其實又係由果堆計過度過既對白而黎，例如Life was like a box of chocolates. You never know what you're gonna get ，我諗大部人都會有限制地咁樣諗起人生如戲之類既老生常談。結果，觀眾出現咗一種標準，一種主流思想去令到月黑高飛(1995)長居IMDB 第一位。當觀眾以為自己好成功地分別到乜野電影有深度既時候，大部份人都開始為電影好壞定咗一個「單一」既標準。

唔太出奇地，當我地提起一套戲，部份人為咗消費埋自己「睇戲唔係淨係為娛樂」呢個咁重要既潛台詞，就會不斷咁去解讀背後既意義，全世界就側重咗去究竟套戲有咩大道理，而唔係究竟套戲用咗咩做法，點樣去傳遞個大道理。而當部份電影劇情甚至完全唔重要，或者超簡單既時候，觀眾就覺得套野無深度喇。觀眾偏愛既都係同導演神交，要既係無限反思，呢個其實係好單一咁去使用電影，其實同將睇戲當hea 時間無分別。故仔好重要，佢可以「難明」，但唔可以「唔明」，如果唔係就係佢錯。

呢種訊息或者應該話「深度」行頭既觀影方式其實會唔會真係有少少問題呢? 又或者話係咪真係要對套套戲既劇情都咁認真，當睇緊一大堆文學，每次睇完一套戲都當自己上完一堂呢? 我相信，今時今日喺香港話自己睇唔明一套戲，同大大聲話俾人聽自己依家都仲係鐘意Twins 係無分別既。戲呢樣野，唔明咪唔明囉。

Man Thinks, God Laughs

當黃子華做演員已經做到心淡，接受咗大部份觀眾都佢定型做一個專做賤格角色既時候，無線竟然將黃子華一直以來喺伊館紅館密密耕耘而建立番黎既知名度用喺一個其實唔太重要既豬肉獎到。開心就梗有少少既，但真係得少少囉。的確睇番成件事係幾難「急阿雪」得落架，反正佢之所以攞到個獎，或多或少都係因為佢依家喺個棟篤笑一出場，已經有人大叫除褲加拍哂手掌。無錯，黃子華今時今日已經紅到爆炸，呢個係連男親女愛時候既余樂天都未曾試過既。今次攞獎既係黃子華，而唔係乜野「香港男」，無線頒一個所謂既「影帝獎」俾黃子華「成個人」，成件事係好那詭異。


每個人都只係有唔同程度既自由? 東急阿雪
浪漫月巴睇舊戲 - 月巴氏 Yes，我睇咗42次《一蚊雞保鑣》

How can you tell if you're drunk if you're never sober? - The World's End (2013)

作為甜筒三部曲既最終章，我係完全收貨既。一如以往，導演Edgar Wright 大玩電影類型，而The World's End喺主題上，亦都明顯地比之前兩套更加灰暗。Shaun Of the Dead (2003) 同 Hot Fuzz(2007) 除咗各自顛覆喪屍片同警匪片既格局之外，亦都有批判行屍走肉式都市人生活元素喺入面，而The World's End 只係將以上既野行前多一步咁去表現出黎。

Gary King(Simon Pegg飾)係一個廢柴，一生人最開心果日，就係有晚同四個老死一次過去十二間酒吧(仲要係唔成功)，除此之外，佢係接近一無是處。當其他四個人都有自己份工，建立緊自己既家庭既時候，佢係完完全全咁停止咗成長。呢個角色同Shaun of The Dead 入面既Ed (Nick Frost 飾)係接近一樣，奇就奇在Gary 係由Simon Pegg 飾演既，The World's End 將Simon Pegg 同 Nick Frost 做開但既角色掉轉，但無論Shaun，定係Nicholas定係The World's End入面既Gary，Simon Pegg 永遠都係最似人果個。

The World's End 講緊既係，Gary 點樣去搵自己早已經唔見咗既過去，佢點樣將自己困喺自己既過去入面，而其他人，特別係大律師Andrew (Nick Frost 飾) 點樣「成熟」到已經覺得所謂既Golden Mile之旅係無野搵野搞。當大家都覺得呢件事唔提好過提，係時候放低既時候。Gary 既執著，就成為咗呢個旅程既開端。原本成長呢個主題已經好豐富，但反英雄既出現，同時又將都市人既生活態度拼埋落成長呢個主題上，係比之前兩套多咗一層哲學味。

戲入面有好多彩蛋(但比起之前兩套已經少咗)，但唔知係有意定無意，Gary 以前既中學老師(Pierce Brosnan 飾) 個名叫Shepherd，第一時間諗起既，係Mass Effect入面帶領全宇宙唔同種族對抗Reapers既Shepard，咁啱個故仔又係講外星高智慧物種地球人融合，一齊BBQ。

Gary係好一廂情願咁要求每個人都陪佢一齊唔好成長，你話佢天真? 又唔係喎。當大家都以為Gary唔知自己係廢柴既時候，其實佢自己都知好多野無咗就無咗，原來佢唔係痴線既，只係理想同現實生活落差太大而自暴自棄。佢喺揀無可揀既時候，唯有做自己剩番既唯一一樣野，就係完成Golden Mile。The World's End 有既唔單止有反烏托邦既取向，仲有一種放棄進步，堅持自己既態度。至少，Gary 到最後都係無改變到既，佢只係繼續做自己唯一剩番同時又覺得開心既野。睇The World's End 係會比之前睇兩套多咗一份沈重，有幾多人可以唔被社會同化，而又咁好彩地將成個世界大洗牌?