巨輪

新一年，第一樣衝擊係上年其中一套無線，講緊既唔係虎頭蛇尾既《My盛Lady》，而係明顯地眼高手低，唔夠錢既《巨輪》。巨輪問題在於，第一，一定係太多鉅記，第二，喺唔夠錢既情況下，要將2013年既香港由八十年代同九十年代既香港重新演繹一次基本上無可能，結果除咗鍾嘉欣同李亞男個造型之外，基本上，成套野都好現代。雖然睇得出套劇有落過心機喺燈光上，好明顯見九十年代無線劇果種室內暖色用咗喺好多場景上(特別係陳展鵬間屋)，不過，始終都係好難說服到觀眾《巨輪》係一套橫跨三十年既時代劇。

另一個問題，係個劇本結構唔完整，要就香港住呢三十年既發展史，但又因為部份角色係無進步過，結果去到後面已經唔係爛尾咁簡單，直頭係無咗個尾，其中比較明顯既一定係張繼聰同李亞男呢類無啦啦唔見咗既角色。假如《巨輪》唔係咁大野心，去將香港呢三十年既變化擺入個劇本入面到，應該會好睇好多。最少唔會有咁多穿崩位，同角色消失。而角色性格亦都好矛盾，例如話第一集蕭正楠搵咗佢大佬咁多年，一見番面竟然咁容易就用木棒扑大佬。角色一係就無進步，一係就完全唔合理咁變化。三十年，似乎真係太多。

我鐘意首主題曲，雖然歌詞入面好明顯唔係2014年既香港，但除咗「那天到異國出走的人潮於今天回流或者都牽掛這都市都捨不得放手」呢句歌詞比較科幻之外，其他野都比同一年淨報喜不報憂既《同舟之情》更加踏實同窩心。睇《巨輪》，有既係一種親切感，雖然所有野都熟口熟面，但所有野舊得黎又相當無線，到今時今日，當鄭子誠做衰人已經做到一個cliche既時候，《巨輪》同《情逆三世緣》反而好努力咁去重現以前無線劇成功既元素。講到尾我講咁多野，其實都係因為田蕊妮個角色設定得太過完美啫。